Certame Asunción Antelo

Hoxe tivemos o pracer de poder asistir á exposición dos traballos gañadores do Certame de Asunción Antelo organizado polo concello de Coristanco. A verdade é que todos os colexios presentaron uns traballos con moita calidade. Non queremos desvelar aínda os premiados do CEIP Canosa Rus xa que faremos a entrega de agasallos o venres 21 pero...aquí tedes algunha mostra...o venres xa poderemos ver os do cole!!que nervios!

Mes das Letras galegas, 17 de maio 2021

Durante todo este mes de maio o noso alumnado celebrará con diferentes actividades o mes das Letras Galegas adicado este ano a Xela Arias. Entre as actividades propostas está o obradoiro de marcapáxinas, kahoot da vida de Xela Arias, elaboración de retratos da escritora... Para finalmente gozar da entrega de premios do noso XXIII Certame Literario e unha sesión de xogos o próximo 21 de maio. Deixámosvos unha pequena mostra dos e das grandes artistas que temos neste colexio, por non dicir do gran nivel das poesías, narrativa, banda deseñada.... que recollemos para a participación no certame, a verdade é que ao xurado puxéronnolo moi difícil.

Barquiños de casca de noz

A semana pasada o noso alumnado realizou unha saída pola contorna para ver navegar os barquiños polo río. Estes barquiños fixéronos en clase con casca de noz, masa de fariña e follas. Unha saída moi bonita xa que nos acompañou un tempo fantástico e puidemos gozar dun bo paseo pola natureza.

Día mundial da poesía

O alumnado de 4º de educación primaria quere compartir unhas poesías para festexar este día, escoitade que ben o fan! Ademais aroveitamos para lembrar a Rosalía de Castro: Podedes atopalas tamén en RADIO NA BIBLIO 20/21! Coma sempre, parabéns rapazada!

Rosalía de Castro

Hoxe é o día de Rosalía de Castro (Santiago de Compostela, 24 de febreiro de 1837-Padrón, 15 de xullo de 1885), unha poeta moi importante para a nosa cultura galega. Ademais foi unha das figuras emblemáticas do Rexurdimento galego, pola súa achega literaria en xeral e polo feito de que os seus Cantares galegos sexan entendidos como a primeira gran obra da literatura galega contemporánea. Esta muller é o símbolo do pobo galego. No CEIP Canosa Rus, non queremos esquezer o seu traballo e é por isto que no día de hoxe fixemos moitas actividades, aí tédelas. Parabén rapazada!

13 de febreiro día da radio

O alumnado de 6º de educación primaria deléitanos cun programa moi especial para celebrar o día da radio, que foi este sábado. Parabéns equipo, sodes xeniais!

Entroidos de Galicia

En moitos lugares de Galicia o Entroido é un dos grandes acontecementos do ano, é por iso, que o noso alumnado quere que, aínda que non se poidan celebrar, lembremos as diferentes tradicións e personaxes máis significativas destas datas. Por iso, estiveron investigando durante este mes de febreiro e aquí tendes o resultado, como non, amosando esa vea artística e creativa que caracteriza á rapazada deste colexio. Gran traballo!