Certame Literario e Letras Galegas 2024

O pasado día 15 de maio, pola tarde, celebramos as Letras Galegas no noso cole. Como ben dixemos na entrada anterior, este ano a autora homenaxeada é Luísa Villalta, da cal falou o alumnado do primeiro ciclo neste festival.
Aproveitamos esta festividade para repartir os premios dos gañadores e gañadoras do Certame que organizamos ano tras ano no noso centro, nas súas respectivas modalidades en cada ciclo: banda deseñada, debuxo, poesía, narrativa e monográfico. Ao equipo de Dinamización da Lingua Galega foinos difícil decidir cales serían os traballos gañadores, xa que eran de moita calidade. Noraboa a todos/as!! Queremos agradecer aos nosos colaboradores en ditos premios: Editorial Xerais, Kalandraka, Vicens Vives, Santillana, Libraría Clarión e Librería Brañas Verdes, ambas de Carballo.
Tivemos, ademais, dúas actuacións musicais, unha dunhas pandereteiras moi especiais, pois son compañeiras da aula de 3º curso: Alba, Carla Varela e Daniela. Fixérono estupendamente!!
Rematamos o acto co baile de "Terra" das Tanxugueiras, que tiñamos preparado todo o alumnado.
Foi unha tarde moi especial!!
Que viva a nosa Lingua!!

LETRAS GALEGAS 2024

Achégase o 17 de maio, o Día que se celebran as Letras da nosa Lingua. Este ano dedícanselle a Luísa Villalta.
Imos a coñecela un pouco:
Luísa Villalta Gómez, A Coruña 1957-2004.
Poeta, ensaísta, dramaturga, articulista, tradutora, violinista, muller comprometida coa lingua, coa cultura, con Galiza e disposta a rebelarse contra aquilo que non sentía xusto.
Luísa nace na Coruña o 15 de xullo de 1957. Gozou dunha infancia feliz, con xogos, debuxos, patinaxe, moita música e lecturas,... xunto a súa irmá Susana e aos seus pais, Rafael Villalta e María Gómez. Estudou no colexio das Xosefinas. Cursou o bacharelato no Instituto Eusebio da Guarda. Licenciouse en Filoloxía Hispánica en Galego-Portugués na Universidade de Santiago de Compostela (USC).
Titulada Superior de Violín, foi integrante da Xove Orquestra de Galiza, de diferentes conxuntos de cámara e do grupo folk “Escaino”.
A música e a literatura conflúen na súa obra.
En 1988 aprobou as oposicións de Lingua e Literatura Galega, exercendo docencia en institutos coruñeses.
Formou parte da directiva de Escritores e Escritoras en Lingua Galega (AELG), do Foro da Cultura Galega, da Mesa pola Normalización Lingüística. Impartiu seminarios, conferencias, recitais de poesía, publicou numerosos artigos,...
O 6 de marzo de 2004 morreu de meninxite e foi enterrada no cemiterio de Santo Amaro da Coruña.
A súa escrita foi premiada varias veces: no certame de relatos curtos Modesto R. Figueirido (1990), por “A taberna do holandés”; co XIII Premio Espiral Maior (2004), polo seu poemario “En concreto”; postumamente, co Premio da Crítica Galega á Creación Literaria (2005) tamén por “En concreto”, etc.

Día Internacional do Libro

O 23 de abril celebrouse o Día Internacional do Libro, e no noso centro fixemos apadriñamentos e amadriñamentos lectores. Os/As maiores léronlle contos aos pequenos e pequenas. Pasamos uns intres moi bonitos!!

Día da Poesía

O pasado 21 de marzo foi o Día da Poesía, e o alumnado de Educación Primaria festexouno escribindo poemas con xiz no chan do patio, xuntándose por parellas ou tríos con compañeiros e compañeiras doutras aulas. Algúns poemas eran composicións propias e outros de autores coñecidos. Despois procedimos a lelas en alto. Aquí vos deixamos unhas imaxes!

Saída a Buño e ó Refuxio de Verdes

O pasado martes, o alumnado de 3º e 4º curso tivo unha saída ao Ecomuseo Forno do Forte, en Buño. Alí contáronlles como era a vida dos alfareiros e como fan as súas pezas, que son auténticas obras de arte. Ademais tiveron a oportunidade de realizar as súas propias pezas. Despois disto, dirixíronse ao Refuxio de Verdes, no noso Concello, para gozar da paisaxe mentres comían e realizaban xogos. Foi unha saída preciosa!!

Día de Rosalía de Castro

O pasado 23 de febreiro foi o día de Rosalía. Ademáis de traballar á nosa autora favorita nas distintas aulas, cantamos no patio a canción do poema de Rosalía "Adiós ríos". Fixémolo xenial!!

Entroido

O alumnado do primeiro curso de educación primaria investigou sobre o entroido nos diferentes lugares de Galicia, deixando unha mostra do seu traballo no corredor. Que viva o entroido galego!!!