María Canosa, na Canosa

O luns 20 de maio recibimos no colexio  á escritora María Canosa. O alumnado de 2º e 3º de primaria leron o seu poemario Acuario, e María asinoulle os libros ao final do acto.

Contounos que se sentía moi contenta de estar nun colexio onde xa viñera  súa nai, a tamén escritora Concha Blanco, xa haberá uns vinte anos.

As nenas e nenos formuláronlle preguntas como: Canto tempo che leva escribir un libro?, Que sentes cando escribes poesía?, Cal e o teu escritor favorito?, Que afeccións tes?....

Descubrimos que admira a Castelao e a súa nai, que lle gusta pasear, ir á praia, ler e estar cos seus fillos; que ten moitas ocupacións e que non pode dedicarlle a escribir todo o tempo que quixera…



Tamén se someteu ás preguntas de catro pequenas xornalistas  na  radio do colexio,  Canosa Onda. María Canosa  bromeu co seu apelido: o noso colexio é o Canosa-Rus e a radio é Canosa Onda. Vaia homenaxe lle fixemos!

DÍA DAS LETRAS GALEGAS

Hoxe, 16 de maio, celebramos no noso colexio o Día das Letras Galegas, no que homenaxeamos a Antón Fraguas e tamén a outros escritores. Estas foron as actividades :

1º O alumnado de 6º realizou unha breve representación teatral sobre algúns escritores galegos que xa foron homenaxeados  incluíndo unha referencia á vida de Antón Fraguas.

2º Dúas mestras, María e Ana, interpretaron coas súas gaitas o HIMNO GALEGO.

3º O alumnado de 3º e 4º e unha nena de 6º recitaron poesías de varios poetas galegos: Antón Cabanillas, Manuel María, Rosalía de Castro…

4º Varios  alumnos  de 5º, faláronnos da importancia do Museo de Pobo Galego  e outros  explicaron o funcionamento dalgúns dos aparellos que temos na exposición de obxectos antigos: rastrelo, buceira, carro, lámpada de aceite, escorredor de rixóns, romana, cortizo… Vaia homenaxe a este museo!

5º Entregamos os agasallos aos premiados da XXI edición do Certame Literario nas modalidades de Narrativa, Banda Deseñada, Poesía, Debuxo e Monográfico. Graciñas a todos os participantes!

Para rematar o acto, cantamos todo xuntos a canción de “O carro ” de Fuxan o ventos.

Para  confeccionar a imaxe xigante de Antón Fraguas, cada aula decorou unha peza a modo de puzle. Quedou bonita!

Recitado de 3º

ROSALÍA SEMPRE VIVA

RECITADO

O 6 de abril, na Casa Museo Manuel María, en Outeiro de Rei, celebrouse a V Edición do Concurso de recitado “Rosalía sempre viva”.

Catro alumnos/as  do noso centro xunto con moitos outros de toda Galicia, participaron neste recitado. Unha na de 6º gañou o 1º premio na súa categoría, recitando un poema de Rosalía titulado “ Nasín cando as prantas nasen” e un de 6º unha mención honorífica, co poema “Galiza”, de Manuel María.

Se queredes saber máis sobre este evento  podedes visitar este páxina: www.casamuseomanuelmaria.gal.

Seguide sempre amando e disfrutando da nosa lingua!

É tempo de entroido!

 

[gallery ids="446,447" type="rectangular"]

O 1 de marzo, celebramos o entroido no colexio. Este ano, os disfraces estaban relacionados co mundo da investigación, da ciencia e dos inventos. Todo isto relacionado co Proxecto Documental Integrado no que estamos traballando este ano, que leva por título “ ConCiénciate”. O centro encheuse de  científicos tolos, robots, coches, Maries Curies, algunha lavadora… e ata unhas velliñas que viñan de moer.

Pero nun entroido  de valer  non pode faltar unha boa merenda a base de filloas, orellas, rosquillas, retorcidos, biscoitos e chocolate.  Ata puidemos degustar filloas feitas no momento nunha  filloeira!



O alumnado de sexto, aproveitou para vender colgantes, marcadores, chaveiros …deseñados por eles e impresos coa impresora 3D. Foi un éxito!

Colgantes á venda

Coñecemos os entroidos de Ourense

 

A mestra de 6º de Educación Infantil, explicoulle a varios cursos como se celebra o entroido nalgunhas vilas de Ourense, centrándose nos BOTEIROS de Viana do Bolo, a súa vila natal.

O BOTEIR0

• É a figura máis importante do Entroido de Viana do Bolo.


• Danza abrindo paso ao Folión ou acompaña (sempre en parella) ás Comparsas, amosándolle aos integrantes destas comitivas a ruta a seguir no desfile.


• Os seus chimpos, berros e movemento de esquilas fan que non pase inadvertido e se converta no auténtico protagonista da festa do entroido.


• Ademais do Boteiro vianés cabe sinalar o Boteiro de Vilarmeao, que se viste como o de Viana pero varía na Pantalla, xa que a substitúe por un sombreiro en forma de cono adornado con grilandas en espiral e tamén na Careta, que é de cartón, mentres que o boteiro tena  de madeira. Danza sempre en círculos ao ritmo que lle marca o Folión. https://www.youtube.com/watch?v=oyZo7kN_m5k

Mural do vestíbulo co boteiro e pantallas.

Celebramos o Día de Rosalía

Terceiro preparándose para recitar

O 24 de febreiro cumpríronse 182 anos do nacemento de  ROSALÍA DE CASTRO, sen dúbida unha das escritoras máis importantes na nosa lingua e convertida xa nun símbolo de Galicia.

Para celebralo, o alumnado do noso centro participou en varias actividades ao longo destes días .Houbo como contacontos na biblioteca escolar durante a hora de ler e   recitado de poesías de autores como  Curros Enríquez, Manuel María, Antonio García Teijeiro, Gloria Sánchez, María Canosa,  e, por suposto, non podía faltar a homenaxeada, Rosalía de Castro. Precisamente, durante varios recreos da semana pasada,  nenas e nenos  de 3º, 4º e 6º recitaron en directo, desde Canosa Onda, para todo o colexio. O alumnado de 6º de E.Infantil participou tamén neste día, cantando “Adios ríos, adiós fontes” que gravamos na nosa radio.

Se queredes escoitar os nosos traballos  podedes facelo en:

http://www.ivoox.com/p_sq_f1638723_1.html

 

Unha visita moi esperada

VISITA DO DOUTOR ÁNGEL MARÍA CARRACEDO ÁLVAREZ

O noso centro tivo a gran honra de contar coa presenza e gran sabedoría dun home excepcional: o doutor Ángel Carracedo.

Foi unha experiencia que os nosos rapaces xamais esquecerán: falounos da súa familia, respondeu ás cuestións que lle formularon tanto o alumnado como as mestras, contounos como o seu equipo axudou á policía británica a “pillar” a un criminal reincidente estudando o seu ADN….Por certo! Asistimos á extracción do ADN dun kiwi!!!!



Nós axudámoslle a desprazarse por diferentes comarcas de Galicia cun escornabot, empezando polas Terras do Xallas e continuando por Bergantiños. Foi tan amable, que ata nos concedeu  unha entrevista en "Canosa Onda" e respondeu a preguntas ben comprometedoras. Confesounos que era “ nefasto" en debuxo.  Non podía ser perfecto, non si?

Moita culpa de que se achegara ao noso colexio tena a súa familia, pois o seu avó era de Rus e moitos dos seus parentes viven por esta contorna.

Sempre agradecidos. Esta é a súa casa e ten as portas abertas de par en par. Un pracer telo por unhas horas ao noso carón en exclusiva.